Обод ва файзли маҳалла – юртимиз кўрки

Бугун, 23 август куни мамлакатимиз бўйлаб «Обод ва файзли маҳалла – юрт кўрки» шиори остида умумхалқ хайрия ҳашари ўтказилмоқда. Бу эзгу анъана юртимизда қадимдан мавжуд бўлиб, халқимизнинг бирдамлик ва ҳамжиҳатлик фазилатларини яна бир бор ёрқин намоён этмоқда.

Мир Араб ўрта махсус ислом таълим муассасасида ҳам бугунги хайрия ҳашари кўтаринки руҳда ташкил этилди. Устоз-ходимлар ва талабалар бирлашиб, атроф-муҳитни тозалаш ва ободонлаштириш ишларида фаол қатнашдилар. Теварак-атрофлар супурилиб, гулзорлар тартибга келтирилди, дарахтлар оқланди. Бу жараён нафақат муассаса ҳудудини чиройли ва озода қилди, балки ҳашарда иштирок этганларнинг қалбига ҳам файз ва қувонч бағишлади.

Ҳашар – бу оддийгина тозалаш ёки супуриш ишлари эмас. Бу, аввало, халқимизнинг қадимий қадриятларидан бўлмиш ўзаро ёрдам, бирдамлик ва меҳр-оқибатнинг амалий ифодасидир. Биргаликда меҳнат қилган инсонлар бир-бирига янада меҳр қўяди, ҳамжиҳатлик руҳи мустаҳкамланади.

Мир Араб мадрасасида ўтказилган бугунги хайрия ҳашари шундан далолат бердики, жамиятимиздаги ҳар бир эзгу иш ҳамиша халқимизнинг қўллаб-қувватлаши ва фаол иштироки билан амалга ошади. Шундай ҳашарлар туфайли маҳаллаларимиз обод, юракларимиз эса файзли бўлиб бораверади.

Билим юрти матбуот хизмати