Жафар Пончаев

Жафар Пончаев 1940 йил 16 мартда Пенза вилоятида тавуллуд топган. Татар миллатига мансуб. Бухородаги Мир Араб мадрасасини тамомлаган. Сўнгра 1971-1975 йилларда Имом Бухорий номидаги ТИИда ўқиган. Институтни тамомлагандан кейин собиқ Иттифоқнинг Европа қисми ва Сибирь мусулмонлари диний идорасига котиб бўлиб ишга киради. 1977 йилда Ленинград (Санкт-Петербург) жоме масжидига имом-хатиб қилиб жўнатилади. Шундан кейин 1991 йилда Россия Федерациясининг шимоли-ғарбий қисми муҳтасиботининг муҳтасиби, 1994 йилдан Россиянинг шимоли-ғарбий қисми ва Санкт-Петербург мусулмонлари диний бошқармасининг раиси, муфтий этиб сайланади.

Жафар Пончаев 2008 йилдан бошлаб Санкт-Петербург ислом институтининг ректори бўлиб ишлайди. У халқаро фанлар академиясининг академиги, Уламолар кенгаши аъзоси, Россия мусулмонлари Марказий диний бошқармаси президиуми аъзоси, Россия Бош муфтийсининг бош маслаҳатчиси, Санкт-Петербург губернаторлиги қошидаги жамоатчилик кенгаши аъзоси, Россия шимоли-ғарбий округининг гиёҳвандликка қарши кураш комиссияси аъзоси бўлиб фаолият юритган. Шунингдек, “Санкт-Петербургда ислом, ислом маданияти ва мусулмон анъаналарининг тикланиши” ҳудудий жамоат фондининг президенти, мунтазам ўтказиб келинадиган “Ислом – тинчлик, адолат ва бағрикенглик дини” илмий-амалий конференциясининг ташаббускоридир.

Жафар Пончаев 2012 йил 27 декабрда вафот этган. У Санкт-Петербургдаги Ново-Волковский қабристонига дафн этилган.