Яшил Макон - келажак учун бугундан ҳаракат

“Яшил макон” – бу шунчаки дарахт экиш кампанияси эмас. Бу атроф-муҳитни ҳимоя қилиш, иқлим ўзгаришига қарши курашиш ва келажак авлодлар учун яшашга яроқли муҳит яратиш йўлидаги кенг кўламли ҳаракатдир. Ўзбекистон ҳукумати томонидан бошланган ушбу ташаббус экологик барқарорликни таъминлаш ва аҳолининг ҳаёт сифати яхшиланишига хизмат қилади.
Бу лойиҳада мақсад аниқ – табиатни тиклаш, лойиҳанинг бош мақсади – мамлакат бўйлаб миллионлаб дарахтлар экиш орқали экологик мувозанатни тиклаш, ҳаво сифати ва тупроқ унумдорлигини ошириш. Дарахтзорлар нафақат чанг ва иссиқликни камайтиради, балки сув ресурсларини сақлаб қолишга ҳам ёрдам беради.
“Яшил макон” доирасида айниқса шаҳарларда яшил ҳудудлар сони кўпаймоқда. Бу – бетон ва асфальт орасида сиқилган инсонлар учун дам олиш, соғлом ҳаёт тарзини юритиш ва руҳий саломатликни тиклаш имконияти дегани. Маҳаллалар, мактаблар, боғчалар ва кўчалар бўйлаб экилган дарахтлар шаҳарнинг кўркини очади, иссиқликни камайтиради ва яшаш жойларини янада жозибадор қилади.
Бу жамоавий ҳаракат, лойиҳа давлат идоралари, хусусий сектор, талаба-ёшлар ва оддий фуқароларнинг биргаликдаги ҳаракати асосида амалга оширилмоқда. Ҳар бир фуқарога дарахт экиш, унга қараш, парвариш қилиш орқали бу ҳаракатда иштирок этиш имконияти яратилган. Бу эса экологик онгни шакллантириш ва барқарор ривожланиш маданиятини мустаҳкамлашга хизмат қилади.
“Бугун эккан ниҳолинг – эртанги соянг” дея бежизга айтилмаган. “Яшил макон” бу фақат экология ҳақида эмас. Бу – масъулият, фарзандларимиз келажаги ҳақида. Бугун экилган ҳар бир дарахт – эртага ҳавонинг тозалиги, одамларнинг соғлиги ва табиат билан уйғун ҳаёт демакдир.
Шундай экан, бугун барчамиз бирлашайлик ва табиатни ривожига ҳисса қўшайлик.

Дилшод Алиев,
Мир Араб ўрта махсус ислом 
таълим муассасаси матбуот котиби.