Бағрикенглик – келажакни барпо этувчи кўприкдир.

Ҳар йили 16 ноябрь куни дунё бўйлаб Халқаро бағрикенглик куни нишонланади. Ушбу сана бағрикенглик, сабр-тоқат ва ўзаро ҳурмат каби қадриятларни тарғиб қилиш мақсадида БМТ томонидан белгиланган. Чунки бугунги глобаллашув даврида миллатлараро тотувлик ва диний бағрикенглик жамиятнинг тинчлиги ва барқарорлигининг муҳим асоси ҳисобланади.
Диний бағрикенгликнинг аҳамияти. Бағрикенглик – бу бошқа эътиқодларни ҳурмат қилиш, ўзаро манфаатли мулоқотни йўлга қўйишдир. Турли дин ва эътиқод вакилларининг тинч-тотув яшаши жамиятнинг маънавий ва иқтисодий ривожланишига ижобий таъсир кўрсатади. Қуръони Каримда:
لَآ إِكۡرَاهَ فِي ٱلدِّينِۖ ٢٥٦
«Динга мажбур қилиш йўқ.» (Бақара сураси, 256-оят) деган оят бағрикенгликнинг асосий тамойилларидан бири эканини эслатади. Шунингдек, ҳадисда: "Ким бирор одамга зулм қилса ёки унинг динига ҳақорат қилса, унга адолат қилмади," дейилган. Бу исломнинг барча динларга нисбатан ҳурматли ёндашувини кўрсатади.
Миллатлараро тотувликнинг замонавий ўрни шуки, бугунги кун глобал муаммоларини ҳал қилишда миллатлараро тотувлик муҳим омил ҳисобланади. Ҳар бир миллат ва элат ўзининг маданияти, урф-одати ва қадриятлари билан дунёга ҳисса қўшади. Бу хилма-хилликни бойлик сифатида қабул қилиш ва ундан унумли фойдаланиш инсониятнинг келажаги учун зарур. Ўзбекистонда бу тамойиллар давлат сиёсати даражасида қўллаб-қувватланиб, барча миллат ва элатлар учун тенг имкониятлар яратилмоқда.
Ўзбекистон кўп миллатли давлат сифатида диний бағрикенглик ва миллатлараро тотувликни ўзининг муҳим қадриятларидан бири сифатида тарғиб қилади. Турли миллат вакиллари ва диний конфессиялар вакиллари тинчлик ва бирдамликда яшашининг ёрқин намунасини кўришимиз мумкин. Мамлакатимизда 16 та диний конфессия рўйхатга олинган бўлиб, улар ўз фаолиятини эркин амалга оширмоқда.
Хулоса қилиб айтадиган бўлсак. Диний бағрикенглик ва миллатлараро тотувлик жамият барқарорлигининг асосидир. Уларни мустаҳкамлаш, нафақат давлат органларининг, балки ҳар бир фуқаронинг бурчидир. Биргаликда фақат ўзаро ҳурмат, сабр-тоқат ва мулоқот орқали тинчлик ва тараққиётга эришиш мумкин. 16 ноябрь – бу тамойилларни яна бир бор эслаш ва уларга амал қилишни чуқур англаш учун ажойиб имкониятдир.

Дилшод АЛИЕВ, 
Мир Араб ўрта махсус ислом 
таълим муассасаси матбуот котиби