ALLOHNING KALOMIGA QULOQ TUTISH QALB SHIFOSI VA QIYOMAT NURI

Olamlarga Qur’onni nur qilib tushirgan va bizni  Qur’on ummati bo'lish baxtiga musharraf etgan Alloh taologa behisob hamdlar bo‘lsin! O‘z ummatlariga bu ilohiy kalomni yetkazgan, xulqlari Qur'on bo'lgan suyukli Payg‘ambarimiz Muhammad sollallohu alayhi va sallamga eng go‘zal salavot va salomlarimiz bo‘lsin.
Inson ruhiyati doimo ma'naviy ozuqaga muhtoj. Bu ozuqani olishning eng go'zal, osoyishta va sunnatga muvofiq yo'li – Allohning kalomini o'qish va unga sokinlik bilan quloq tutishdir.
Qur’oni Karimni tinglash, unga quloq tutish borasida Imom Ahmadning “Musnad” asarlarida Abu Hurayra roziyallohu anhudan rivoyat qilingan go'zal bir hadis keltiriladi. Janobimiz sollallohu alayhi va sallam shunday marhamat qiladilar:
"Kimki Allohning kitobidan bir oyatga quloq solsa, unga chandon-chandon (ko‘paytirilgan) yaxshilik yoziladi. Kim uni tilovat qilsa, qiyomat kuni unga nur bo‘ladi."
Bu naqadar ulug' xushxabar! Aqlli va qalbi uyg'oq musulmon kishi shunday benihoya savoblarga erishish umidida o'z vujudini va e'tiborini ilohiy kalomga baxshida etadi. Qur'oni Karim oyatlariga nafaqat til bilan, balki butun borliq bilan quloq solish – ochiq-oydin Qur'oniy buyruq va mo'minlik burchidir.
Biz yashab turgan tezkor, turli chalg'ituvchi vositalarga boy zamonda, afsuski, Qur'on tilovatiga nisbatan e'tiborsizlik holatlari ko'zga tashlanmoqda. Namozlarni ado etib bo'lgach, hech bir jiddiy zaruratsiz Qur'on tilovatini oxirigacha tinglamay masjidni tark etish odatiy holga aylanib qoldi.
Ulamolarimiz haqiqatan ham zarurat yuzasidan chiqishga ruxsat berganlar. Ammo namozdan so'ng masjid hovlisiga chiqib olib dunyoviy suhbatlar qurish, tilovat vaqtida qo'l telefonlariga chalg'ish, ijtimoiy tarmoqlarni kuzatish aslo bu zarurat darajasiga ko'tarila olmaydi. Axir, o'zimizni qiyomatdagi nurdan va ko'paytirib beriladigan beqiyos ajrlardan nega o'z qo'limiz bilan mahrum qilishimiz kerak?
Asrlar davomida an'anaviy ta'lim dargohlarida kitobga, xususan, Ilohiy Kalomga bo'lgan hurmat eng oliy darajada o'rgatib kelingan. Qur'oni Karimni tinglashning o'ziga xos qat'iy odoblari bor:
• Harakatdan to'xtash: Kalomulloh o'qilayotganda barcha a'zolar ortiqcha harakatdan to'xtab, butun e'tibor oyatlarga qaratilishi sunnatdir.
• Amal qilish istagi: Qalbda "Shu eshitayotganlarimga amal qilaman" degan samimiy niyatning bo'lishi.
• Yuksak ehtirom: Tinglovchi garchi arab tilini mukammal bilmasa va ma'nolarni tushunmasa-da, "Bu mening Robbimning so'zi" degan yuksak ehtirom bilan quloq tutishi lozim.
Kimki shunday hurmatni bajara olsa, Alloh taolo uning qalbiga bu o'qilayotgan nurlarning ta'sirini soladi va ezgu amallarga tavfiq beradi. Qalb qulog'i bilan eshitish — ma'rifat va hidoyat eshiklarini ochuvchi birinchi kalitdir.
Gunohdan yiroq bo'lish, ulkan savoblarga erishish va eng muhimi, qiyomat kunida o'zimizga nur zaxirasini to'plash uchun albatta ushbu go'zal sunnatga amal qilishimiz zarur. Alloh taolo barchamizni O'zining Kalomiga yuksak ehtirom bilan quloq tutadigan, eshitganlariga go'zal tarzda amal qiladigan va Qur'on shafoatiga erishadigan saodatmand bandalaridan qilsin!

Diyor qori Ahmedov,
Mir Arab oʻrta maxsus islom ta'lim 
muassasasi Qurʼon va tajvid fani mudarrisi